A MAMMA
A mamma è n’ata cosa,
o cerviello,
ll’asse d’a casa,
’o sciato,
ll’armunia.
E' chella ca
cumanna ‘a compagnia:
sta ‘ncapo o capo d'a casa:
è nu cappiello.
Attuorne tene sempe nu ruciello
abbada a mille cose,
fa ‘a Maria;
e si nun sbatte pe’ na malatia,
va ascenne sempe ll’ago cu’o rucchiello.
A chi nu punto
a chi na cera storta,
a chi nu vaso,
a chi n’ avvertimento...
E se capisce a mamma quanne è morta,
quanne nun ce sta cchiù sta scucciantona;
ca pare ca t’accide ogni mumento
e, doppe nu minute,
te perdona
|
